បាត់ដំបង៖ យុវជនម្នាក់បានសម្រេចធ្វើអត្តឃាតបញ្ចប់ជីវិតដោយចងកសម្លាប់ខ្លួនព្រោះតែមានទំនាស់ពាក្យសំដីជាមួយគូដណ្តឹងបន្តិចបន្តួច។
សមត្ថកិច្ចឱ្យដឹងថា ហេតុការណ៍ធ្វើអត្តឃាតដោយចងកខាងលើនេះកើតឡើងនៅវេលាម៉ោង០១:០០នាទីរំលងអធ្រាត្រ ឈានចូលថ្ងៃទី០៨ ខែតុលា ឆ្នាំ២០២១ ស្ថិតនៅចំណុចផ្ទះលេខ៤៤ ក្រុមទី០២ ភូមិស្នឹងលិច ឃុំស្នឹង ស្រុកបាណន់ ខេត្តបាត់ដំបង ។
ប្រភពនៅកន្លែងកើតហេតុបានប្រាប់ថា នៅមុនពេលកើតហេតុជនរងគ្រោះឈ្មោះ ម៉ៅ ថៃ ភេទប្រុស អាយុ១៩ឆ្នាំ រស់នៅក្នុងភូមិ ឃុំកើតហេតុខាងលើ បានមានទំនាស់ពាក្យសំដីជាមួយគ្នានិងគូដណ្តឹងរបស់ខ្លួន លុះក្រោយមកនៅយប់រំលងអធ្រាត្រក៏ស្រាប់តែបុរសជាជនរងគ្រោះបានធ្វើអត្តឃាតដោយយកខ្សែ (ចងក) ជាប់ទៅនឹងមេឃអំពិលស្លាប់តែម្តង។
ក្រោយពេលកើតហេតុសមត្ថកិច្ចជំនាញបានចុះទៅពិនិត្យកោសល្យវិច័យរួចប្រគល់សពអោយខាងសាច់ញាតិដើម្បីរៀបចំធ្វើបុណ្យតាមប្រពៃណី៕
